POMPONII MELAE
DE SITU ORBIS

LIBER I.

CAP. II. - Brevis Asiae Descriptio.

Tribus hanc e partibus tangit Oceanus, ita nominibus ut locis differens; Eous ab Oriente, a Meridie Indicus, a Septemtrione Scythicus. Ipsa, ingenti ac perpetuâ fronte versa ad Orientem, tantum ibi se in latitudinem effundit, quantum Europe et Africa, et quod inter ambas Pelagus immissum est. Inde cum aliquâtenus solida processit, ex illo Oceano, quem Indicum diximus, Arabicum mare et Persicum, ex Scythico Caspium recipit: et ideo quâ recipit angustior, rursus expanditur, et fit tam lata, quam fuerat. Deinde, cum jam in suum finem aliarumque terrarum confinia devenit, media Nostris aequoribus excipitur: reliqua altero cornu pergit ad Nilum, altero ad Tanaïn. Ora ejus cum alveo Nili amnis [ripi] descendit in Pelagus; et diu, sicut illud incedit, ita sua litora porrigit: dein fit venienti obviam, et primum se ingenti ambitu incurvat; post se ingenti fronte ad Hellesponticum fretum extendit: ab eo iterum obliqua ad Bosporum, iterumque ad Ponticum latus curva, aditum Maeotidos transverso margine attingit. [Ipsam gremio ad Tanaïn usque complexa,] fit ripa, quâ Tanaïs est. In eâ primos hominum ab Oriente accipimus, Indos, et Seras, et Scythas. Seres media ferme Eoae partis incolunt; Indi et Scythae ultima; ambo late patentes, neque in hoc tantum pelagus effusi. Spectant enim etiam Meridiem Indi; oramque Indici maris (nisi quoad aestus inhabitabilem efficiunt) diu continuis gentibus occupant. Spectant et Septemtrionem Scythae; ac litus Scythicum (nisi unde frigoribus arcentur) usque ad Caspium sinum possident. Indis proxima est Ariane, deinde Aria, et Cedrosis, et Persis ad sinum Persicum. Hunc populi Persarum ambiunt, illum alterum Arabes. Ab his quod in Africam restat, Aethiopum est. Illic Caspiani, Scythis proximi, sinum Caspium cingunt. Ultra Amazones, ultraque eas Hyperborei esse memorantur. Interiora terrarum multae variaeque gentes habitant; Gandari et Pariani, et Bactri, Sugdiani, Harmatotrophi, Comarae, Comani, [Paropanisii,] Dahae, super Scythas, Scytharumque deserta. At super Caspium sinum, Chomari, Massagetae, Cadusii, Hyrcani, Iberi. Super Amazonas et Hyperboreos, Cimmerii, Cissi, Heniochoe, Georgi, Moschi, Cercetae, Toretae, Arimphaei; atque, ubi in Nostra maria tractus excedit, Matiani, Tibareni, et (notiora jam nomina) Medi, Armenii, Commageni, Mariandyni, Veneti, Cappadoces, Gallograeci, Lycaones, Phryges, Pisidae, Isauri, Lydi, Syrocilices. Rursus ex his quae Meridiem spectant, [eaedemque] gentes interiora litore tenent usque ad sinum Persicum. Super hunc sunt Parthi, et Assyrii: super illum alterum Babylonii, et super Aethiopas Aegyptii. Ripis Nili amnis et mari proxima iidem Aegyptii possident. Deinde Arabia angustâ fronte sequentia litora attingit. Ab eâ usque ad flexum illum, quem supra retulimus, Syria; et in ipso flexu, Cilicia; extra autem, Lycia et Pamphylia, Caria, Ionia, Aeolis, Troas, usque ad Hellespontum. Ab eo Bithyni sunt ad Thracium Bosporum. Circa Pontum aliquot populi, alio alioque fine, uno omnes nomine Pontici. Ad lacum, Maeotici; ad Tanaïn, Sauromatae.