POMPONII MELAE
DE SITU ORBIS

LIBER I.

CAP. III. - Brevis Europae Descriptio.

Europa terminos habet, ab Oriente Tanaïn, et Maeotida, et Pontum; a Meridie reliqua Nostri maris; ab Occidente Atlanticum; a Septemtrione Britannicum Oceanum. Ora ejus, forma litorum a Tanai ad Hellespontum, qua ripa est dicti amnis, qua flexum paludis ad Pontum redigit, qua Propontidi et Hellesponto latere adjacet, contrariis litoribus Asiae non opposita modo, verum etiam similis est. Inde ad Fretum, nunc vaste retracta, nunc prominens, tres maximos sinus efficit; totidemque in altum se magnis frontibus evehit. Extra Fretum, ad Occidentem, inaequalis admodum, praecipue media, procurrit ad Septemtrionem, nisi ubi semel iterumque grandi recessu abducitur, paene ut directo limite extenta est. Mare, quod primo sinu accipit, Aegaeum dicitur: quod sequenti, in ore, Ionium; Adriaticum, interius: quod ultimo, nos Tuscum, Graii Tyrrhenum perhibent. Gentium prima est Scythia, alia quam dicta est, a Tanai in media ferme Pontici lateris; hinc in Aegaei partem pertinens Thracia Macedoniae adjungitur. Tum Graecia prominet, Aegaeumque ab Ionio mari dirimit. Adriatici latus Illyris occupat. Inter ipsum Adriaticum et Tuscum, Italia procurrit. In Tusco intimo Gallia est, ultra Hispania. Haec in Occidentem, diuque etiam ad Septemtrionem, diversis frontibus vergit. Deinde rursus Gallia est, longe et a Nostris litoribus huc usque permissa. Ab eâ Germani ad Sarmatas porriguntur, illi ad Asiam.